Bio je nesvakidašnji, van uobičajenog, dok je plesao svjetskim terenima, a od sada će njegov nadimak koji je proslavio fudbalsku igru i zvanično značiti upravo to - "nesvakidašnji".
Pele je sada zvanično kao pridjev ušao u portugalski rječnik Brazila, objavio je Rojters.
Naravno, riječ je o možda i najvećem fudbaleru svih vremena Edsonu Aranteš do Nasimentu ili jednostavno i svima dobro poznato Peleu.
Ranije ovog mjeseca, "Fondacija Pele" i SporTV pokrenuli su kampanju "Pele u rječniku" kako bi odali počast velikom Brazilcu i kako bi se prepoznalo njegovo nasljeđe i u drugim oblastima osim sporta.
Pošto je kampanja brzo dostigla više od 100.000 potpisa, ime nekadašnje legende, koja je preminula u decembru, sada je upisano u rječnik.
"Pele - to je ili neko ko je nesvakidašnji ili ko se po svom kvalitetu, vrijednosti ili superiornosti ne može izjednačiti ni sa čim ili bilo kim - baš kao Pele", nova je stavka u rječničku koja je predstavljena na Sportskom samitu u Pakambuu, u brazilskoj saveznoj državi Sao Paulo.
Pele (1940-2022), koji je tri puta osvojio Svjetsko prvenstvo smatran je najvećim sportistom svih vremena - izuzetan, neuporediv, jedinstven.
"Primjeri: On je Pele košarke, ona je Pele tenisa, ona je Pele brazilske dramaturgije, on je Pele medicine".
Peleovoj porodici uručena je plaketa sa ovom novinom, rječnik ju je već uvrstio u svoje digitalno izdanje, a biće uključena u sljedeću štampanu verziju.
"Kampanja 'Pele' u rječniku je jedna od najoriginalnijih u kojima smo ikada učestvovali... Njegovo ime u rječniku je veoma važan dio njegovog nasljeđa koji će Pelea zauvijek održati u životu", rekao je Žoe Fraga, izvršni direktor Fondacije Pele.
Bonus video:
