Menadžer Lestera se izvinio novinaru zbog uvreda - Vijesti.me
"EMOTIVNA REAKCIJA"

Menadžer Lestera se izvinio novinaru zbog uvreda

"Jan, izvinjavam se zbog sinoćnjeg ponašanja, nadam se da to neće narušiti naš odnos. To je bila emotivna reakcija, a ja se ne plašim da ih pokazujem. Dodijelili su mi razna imena, ljudi na to imaju pravo, ali izviniću se kad god pretjeram i to danas radim", rekao je Pirson

Najdžel Pirson
Najdžel Pirson (Foto: Beta/AP)

Menadžer Lestera Najdžel Pirson izvinio se novinaru kojeg je izvrijeđao na konferenciji za medije poslije utakmice sa Čelzijem nazvavši ga "glupim" i "nojem".

Novinar Jan Bejker je sinoć upitao Pirsona da pojasni na šta je mislio kada je rekao da su često kritikovani ove sezone.

"Ako ne znaš odgovor na to pitanje onda si noj! Sigurno ti je glava bila zabijena u pijesak! Da li si sposoban i dovoljno fleksibilan da izvučeš glavu iz pijeska? Ako mene pitaš - nisi. Ja mogu da izvučem glavu, ti ne", rekao je on.

"Ti si ovdje prilično dugo i poznaješ situaciju i na kraju mi postaviš takvo pitanje. To znači da si lud ili glup. Izvini, ali ti nisi normalan! Nemoj da mi prodaješ "maglu", nemoj molim te", dodao
je Pirson.

Uslijedilo je izvinjenje.

"Jan, izvinjavam se zbog sinoćnjeg ponašanja, nadam se da to neće narušiti naš odnos. To je bila emotivna reakcija, a ja se ne plašim da ih pokazujem. Dodijelili su mi razna imena, ljudi na to imaju pravo, ali izviniću se kad god pretjeram i to danas radim", rekao je Pirson.

Bejker je napisao na Tviter profilu da prihvata izvinjenje.