Suočeni sa isticanjem vremena za evropski izvoz ugrožen američkim carinskim tarifama, Emanuel Makron i Fridrih Merc pokazali su se noćas kao jedinstveni front u odgovoru Vašingtonu, ali su istakli duboke razlike oko velikog evropskog odbrambenog projekta.
Lideri dvije najveće ekonomije Evropske unije (EU) sastali su se na radnoj večeri u Berlinu, a tročasovni razgovor je bio "veoma intenzivan, veoma prijateljska i pun povjerenja", prema kancelariji njemačkog premijera.
Pariz i Berlin žele da istaknu novi zamah u svojim odnosima povezan sa dolaskom konzervativnog Fridriha Merca za kancelara. Ovo je bila prva posjeta francuskog šefa države Njemačkoj od inauguracije Merca početkom maja.
U fokusu sastanka bili su teški trgovinski pregovori sa administracijom predsjednika Sjedinjenih Američkih Država (SAD) Donalda Trampa koja je postavila 1. avgust kao rok za moguće carine od 30 odsto na evropski izvoz u SAD.
"Vrijeme nije moglo biti bolje" za razgovor o ovom pitanju, naglasio je kancelar koji je napomenuo da bi se neposredno mogle donijeti "odluke" glavnog pregovarača EU, Maroša Šefčoviča koji brani stav 27 članica EU, i njegovih američkih kolega.
Dok Francuska vrši pritisak na Brisel da zauzme čvrst stav da bi izvršio pritisak na Vašington, druge zemlje, poput Njemačke, naglašavaju važnost deeskalacije sa SAD.
Na kraju krajeva, francuski predsjednik i njemački kancelar "istakli su svoju zajedničku viziju za pregovore", rekao je portparol Fridriha Merca poslije sastanka.
Obojica se "slažu da imaju druge instrumente trgovinske politike ako pregovori propadnu i spremni su da razviju nove mjere", dodao je on.
Međutim, primijećeno je francusko-njemačko neslaganje oko projekta "Budući borbeni avion" (SCAF), vodećeg projekta za odbranu EU, čiji je razvoj u zastoju, dok i Pariz i Berlin žele svako za sebe da budu pokretačka snaga ponovnog naoružavanja Evrope.
Grupa za aeronautiku Daso, koja predstavlja Francusku u ovom projektu, izrazila je sumnje u budućnost i održivost tog programa koji je još daleko od bilo kakve faze izgradnje prototipa.
Daso poziva traži "pravog industrijskog lidera", umjesto trenutne strukture "tri partnera jedan po jedan", po komentarima ove nedjelje Erika Trapjea, izvršnog direktora te grupe. S njemačke strane, projekat vodi Erbas preko svoje Divizije za odbranu i svemir. Treći partner je Španija. Fridrih Merc je insistirao na potrebi da se "poštuju postignuti sporazumi" o podjeli zadataka.
Cilj SKAF-a je da zamijeni Rafal u Francuskoj i Jurofajter u Njemačkoj i Španiji do 2040. godine.
U pokušaju da se izbjegne potpuni neuspjeh tog programa, francuski i njemački ministri odbrane su zaduženi da "do kraja avgusta procijene realne izglede za nastavak saradnje unutar konzorcijuma i podnesu predloge za rješavanje postojećih sukoba", najavila je Kancelarija.
Plan je da se zaključci izvedu na Francusko-njemačkom savjetu ministara 28. i 29. avgusta u Tulonu, u Francuskoj, čija je luka dom jedne od dvije glavne francuske pomorske baze.
Pariz i Berlin takođe nisu riješili sve svoje razlike o politici energetike što je dugogodišnje pitanje, iako je izvjesno približavanje u toku. Francuska posebno insistira na konceptu "tehnološke neutralnosti" da bi se nuklearna energija tretirala slično obnovljivim izvorima energije u propisima EU.
Klasifikacija nuklearne energije kao "zelene" na nivou EU bila je ranije glavna tačka neslaganja Francuza i Njemaca.
Suočavajući se s teškoćama na domaćem planu, gdje je njegova koalicija u prvim turbulencijama, njemački kancelar nastavlja da nastoji da ojača uticaj Njemačke na međunarodnoj sceni.
Veoma kritičan prema EU čiji rad otežavaju njena pravila i unutrašnje svađe, on se oslanja na jačanje odnosa sa Parizom i Londonom koje je posjetio u julu - poput Emanuela Makrona, da bi podstakao zajedničke inicijative.
Bonus video:
