Abdelkader Mera pomagao bratu u ubistvima? - Vijesti.me
SAUČEsNIŠTVO

Abdelkader Mera pomagao bratu u ubistvima?

Policija i tužioci su opisali Abdelkadera kao radikalnijeg islamistu, nego što je to bio njegov brat Mohamed Mera

Francuske vlasti su naredile da brat ubijenog islamskog fanatika Mohameda Mere bude zadržan zbog sumnje u umiješanost u ubistva troje jevrejske djece, jednog rabina i tri vojnika.

Iz kancelarije javnog tužioca u Parizu je saopšteno da je preliminarna istraga potvrdila da ima dovoljno materijala da se opravda pritvaranje Abdelkadera Mere, javila je agencija Rojters.

Abdelkader (29) je uhapšen u ranim jutarnjim časovima u srijedu dok su pripadnici elitne jedinice vršili opsadu stana u Tuluzu u kome je živio Mohamed, Francuz alžirskog porijekla.

Mohamed Mera je ubijen u razmjeni vatre sa policijom nakon što je priznao da je počinio ubistva.

Čini se da Mera nije bio dio neke fundamentalističke mreže, a policija pokušava da ustanovi da li je na njega vršio uticaj Abdelkader Mera, koji je poznat službama bezbjednosti od 2007. zbog pomaganja u krijumčarenju džihadista u Irak.

Abdelkaderovi prijatelji su ubijeđeni da je on izvršio uticaj na Mohameda.

„Prije Mohameda se okrenuo religiji. Naučio ga je svemu. Plašim se da ga je on na to naveo“, izjavio je 30-godišnji Karin za „Parisijen“.

List je takođe citirao Mohamedovog cimera iz ćelije, koji tvrdi da mu je Abdelkader u zatvor donosio CD-ove koji promovišu fundamelističko nasilje.

Policijskom istragom došlo se do ozbiljnih dokaza koji „vjerovatno ukazuju na njegovo (Abdelkaderovo) učešće u zločinu u svojstvu saučesnika“, navodi se u saopštenju javnog tužioca.

Kao navodni prekršaji navedeni su umiješanost u ubistva i krađe.

U pritvoru je bila i supruga Abdelkadera Mere, ali protiv nje nije podignuta optužnica i ona je oslobođena, naveo je Rojters.

Abdelkader je na preliminarnom saslušanju poručio da je ponosan na pucački pohod Mohameda Mere, ali da nije umiješan u napade, kazao je izvor iz policije. Na istom saslušanju je priznao da je sa bratom ukrao skuter koji je korišćen u ubistvima.

Pariski tužilac Fransoa Molan je rekao da je policija pronašla eksploziv u njegovim kolima.

Prema dostupnim informacijama, Abdelkader je 2010. proučavao Kuran u Egiptu, a francuska policija je ranije pronašla vezu između braće i radikalne islamističke grupe sa sjedištem na jugu Francuske.

Islamski ekstremisti u Pakistanu su saopštili da je Mohamed odradio obuku sa talibanima u jednom kampu blizu granice sa Avganistanom.

„Mohamed Mera je odradio obuku u Sjevernom Vaziristanu sa Tehrik-e-Taliban Pakistan (TTP)“, kazao je Ahmet Marvat, koji se predstavio kao portparol Jandola frackije TTP-a.

Sarkozi zabranio ulazak Al Karadaviju

Francuska vlada će zabraniti ulazak u zemlju jednom uticajnom egipatskom propovjedniku ukoliko prihvati poziv jedne islamske organizacije da posjeti Francusku sljedećg mjeseca, izjavio je bliski saradnik predsjednika Nikole Sarkozija.

Poslije pucačkog pohoda Muhameda Mere, Sarkozi je najavio obračun sa osobama koji prate poruke islamskih ekstremista na radikalnim sajtovima. Anri Geno je kazao da će vlada preduzeti mjere da bi spriječila ulazak šeika Josefa al Karadavija ako bude prihvatio poziv Unije islamskih organizacija u Francuskoj (UOIF).

„Francuska vlada ne želi da ekstremistički propovjednici ulaze na njenu teriotriju“, izjavio je Geno, savjetnik i autor Sarkozijevih govora, za Radio J. „Ovoj osobi nije neophodna viza jer ima diplomatski pasoš, ali mogu biti preduzete mjere kako bi se spriječio njegov ulazak u Francusku“, dodao je.

Al Karadavi jedan je od najuvaženijih sunitskih muslimanskih sveštenika u arapskom svijetu. Bivši je član egipatske Muslimanske braće, sa kojima i dalje ima bliske veze.


Najčitanije iz sekcije Evropa