U SAD se danas odrzava najmasovnije glasanje na unutarstranačkim izborima Republikanaca i Demokrata, poznato kao "Superutorak", tokom kojeg će se izjasniti birači u 12 američkih saveznih država i jednoj teritoriji.
Kako navodi Si-En-En, potencijalni kandidati za šefa Bijele kuće iz redova Republikanske partije bore se za 595, a iz Demokratske partije za povjerenje 865 stranačkih delegata, koji dolaze iz Alabame, Aljaske, Američke Samoe, Arkanzasa, Kolorada, Džordžije, Masačusetsa, Minesote, Oklahome, Tenesija, Teksasa, Vermonta i Virdžinije.
Da bi republikanski kandidat osigurao predsjedničku nominaciju i učestovao na novembarskim izborima potrebno je da ima podršku ukupno 1.237, a kod demokrata 2.383. delegata.
Nakon februarskih izjašnjavanja u četiri savezne države kod Republikanaca vodi Donald Tramp, a kod Demokrata Hilari Klinton i njima bi "Superutorak" mogao da bude najvažniji dan u ovom izbornom nadmetanju.
Jučerašnje istraživanje koje je naručio Si-En-En pokazalo je da bi, u slučaju da se već danas održe izbori za Bijelu kuću i Klintonova i njen stranački rival Berni Sanders lako pobijedili Trampa, a da bi bivša državna sekretarka SAD teže izašla na kraj sa Trampovim stranačkim rivalima - senatorom sa Floride Markom Rubiom i teksaškim senatorom Tedom Kruzom.
Što se tiče stranačkih trka, i Tramp i Klintonova su uoči "Superutorka" dominirali u anketi, pa se tako za Trampa izjasnilo čak 49 odsto republikanskih ispitanika - 30 odsto više nego za Rubija kao prvog pratioca. Kod Demokrata Klintonova je imala 55 odsto podrške u odnosu na Sandersovih 38 odsto.
Iako je praktično Trampova cjelokupna kampanja bila dobrim dijelom zasnovana na medijskom spektaklu i brojnim kontroverznim izjavama, posljednjih nekoliko dana pred "Superutorak" on je posebno bio u fokusu zbog podrške koju je dobio od Dejvida Djuka, bivšeg vođe Kju Kluks Klana. Tramp se već par puta neformalno izjasnio da se odriče te podrške, ali to nije učinio i u živom TV prenosu u nedjelju, za šta je okrivio loše slušalice zbog kojih nije dobro čuo pitanje.
Rivali iz redova Demokrata su ga odmah napali zbog podrške rasista, a Rubio je kazao da je milijarder i bivša zvijezda rijalitija time dokazao da Trampa "nije moguće birati" za predsjednika.
"Baš me briga koliko su neispravne slušalice, riječi Kju Kluks Klan se prilično jasno čuju", kazao je Rubio.
Galerija
Bonus video:
