Turski predsjednik Redžep Tajip Erdogan pozvao je danas Katar i četiri arapske zemlje koje su izolovale tu malu zemlju u Persijskom zalivu da pregovaraju o okončanju krize.
Erdoganov portparol Ibrahim Kalin rekao je da je turski predsjednik izrazio podršku posredničkim naporima Kuvajta u tom sporu i inicijativama za rješenje krize putem dijaloga, navodi Asošiejted pres.
Erdogan je danas stigao u Dohu na razgovore s katarskim emirom Tamimom bin Hamadom Al Tanijem, koji je kazao da je njegova zemlja otvorena za dijalog sve dok se poštuje njen suverenitet.
Predsjednik Turske juče se sastao s kraljem Saudijske Arabije Salmanom, koji predvodi blok zemalja protiv Katara, među kojima su i Egipat, Ujedinjeni Arapski Emirati i Bahrein.
Erdogan je iz Saudijske Arabije otišao u Kuvajt gdje ga je primio emir Sabah el-Ahmad el-Sabah, posrednik u zalivskoj krizi.
Prije Erdogana u posjeti tom regionu bili su i zvaničnici SAD, Velike Britanije, Nemačke i Francuske, u pokušaju da doprinesu smanjenju napetosti.
Turska prethodnih godina razvija sve bliže odnose s Katarom, a rezultat toga je i prošlogodišnje otvaranje prve turske vojne baze u Persijskom zalivu, upravo u toj zemlji.
Saudijska Arabija, Egipat, Bahrein i Ujedinjeni Arapski Emirati prekinuli su početkom juna odnose s Katarom i fizički izolovale tu zemlju iz vazduha, s mora i kopna, zbog njegove navodne podrške ekstremističkim grupama u regionu.
Te četiri arapske zemlje postavile su 22. juna Kataru 13 zahtjeva, među kojima su bili prestanak podrške ekstremističkim grupama, zatvaranje medijske kuće Al Džazira, prekid odnosa s Iranom i zatvaranje turske vojne baze u Kataru.
Katar je odbacio optužbe da podržava teroriste i odbio postavljene zahtjeve.
Arapski kvartet je potom, 18. jula, pozvao Katar da se obaveže na šest principa borbe protiv ekstremizma i terorizma i da se putem pregovora dodje do plana za sprovodjenje tih principa.
Tokom posjete američkog državnog sekretara Reksa Tilersona tom regionu, Katar i SAD su 11. jula potpisali sporazum o borbi protiv terorizma, da bi Katar 20. jula usvojio izmjene zakona o borbi protiv terorizma, koje predviđaju uvođenje "spiskova terorista i terorističkih entiteta" i neophodnih mjera za stavljanje ljudi i grupa na taj spisak.
U Kataru se osim turske vojne baze nalazi i vazduhoplovna baza Udeid, najveća američka baza na Bliskom Istoku. U njoj je stacionirano oko 10.000 američkih vojnika i ona je centar za operacije međunarodne koalicije protiv Islamske države.
Bonus video:
