Inspekcija tvrdi da nema zagađenja mora

Potonula jahta u Boki: Ko je i kako prepustio "Katarinu" udaru oluje na nesigurnom vezu u Dobroti?

"Jahta je potonula uslijed nevremena, odnosno olujnog vjetra koji je podigao velike talase, a koji su juče poslijepodne na ovoj lokaciji dostizali i pet metara visine", kazao je inspektor sigurnosti plovidbe Željko Lompar

61959 pregleda 200 reakcija 40 komentar(a)
Jahta "Katarina", Foto: Inspekcija sigurnosti plovidbe
Jahta "Katarina", Foto: Inspekcija sigurnosti plovidbe

Motorna jahta "Katarina", tipa "Sun Quest 44", koja vije austrijsku zastavu, potonula je u subotu kasno poslijepodne, uz pristanište u blizini crkve Svetog Matije u Dobroti.

Brod dužine 13,6 metara na kome u trenutku incidenta nije bilo posade, legao je na dno odmah uz pristanište, nakon čega mu je iznad morske površine virio samo gornji dio nadgrađa.

Jahta je danas oko 13 sati uz pomoć ronilaca, dizalice i pumpi izvađena sa dna mora i vraćena joj je plovnost, ispumpavanjem vode jer začudo, po riječima inspektora sigurnosti plovidbe Željka Lompara, njen trup nije pretrpio oštećenja uslijed kojih bi ona imala novi prodor vode.

Vađenje jahte
Vađenje jahtefoto: Uprava policije Inspekcija sigurnosti plovidbe

"Jahta je potonula uslijed nevremena, odnosno olujnog vjetra koji je podigao velike talase, a koji su juče poslijepodne na ovoj lokaciji dostizali i pet metara visine. Jahta je bila vezana tako da je krmom bila izložena najvećem udaru talasa, koji su onda postepeno u nju ubacivali vodu i naplavili čitav brod. Najbitnije u svemu je da u ovom incidentu nije bilo nikakvog zagađenja mora jer u rezervoarima jahte nije bilo goriva, niti je došlo do izlivanja ulja iz njenih motora", kazao je danas oko 14.30 sati "Vijestima" inspektor Lompar koji je bio na licu mjesta u Dobroti gdje je tada već završena operacija spašavanja i izvlačenja potonulog broda.

Na licu mjesta su bili i predstavnici Uprave pomorske sigurnosti i upravljanja lukama Crne Gore (UPSUL) koji su bili spremni da intervenišu sa plutajućim branama i drugim tehničkim i hemijskim sredstvma u slučuaju da se sa potonule jahte zabilježilo bilo kakvo izlivanje goriva ili drugih zauljenih voda.

Lompar je kazao da je inspekcijski nadzor još u toku, da je na lice mjesta u međuvremenu došao i vlasnik jahte koji je iz Podgorce i koji ga je, kako je kazao, obavijestio da je brod bio u postupku preregistracije sa austrijske na crnogorsku zastavu i da je stim u vezi, nedavno pregledan od strane Tehničkog inspektorata UPSUL-a kako bi započela procedura upisa "Katarine" u crnogorski Registar jahti.

Lompar je najavio da će kompletan izvještaj o ovim incidentu Inspekcija sigurnosti plovidbe načiniti u ponedjeljak.

Prema nezvaničnim saznanjima "Vijesti", o ovom incidentu Lučka kapetanija Kotor i Inspekcija sigurnosti plovidbe nadležna za akvatorijum Boke juče i danas ujutro nisu zvanično obavijestili Pomorski operativni centar po proceduri predviđenoj za svaki ovakav vanredni događaj na moru.

Poznavaoce prilika u pomorstvu čudi i to kao je vlasnik broda ostavio "Katarinu" koja inače, djeluje prilično zapušteno, na nesigurnom vezu u Dobroti, bez posade i bez adekvatnih preduzetih mjera osiguranja broda od nevremena koje je pravovremeno najavljeno od meteo-službe, te kako je moguće da brod u svojim rezervoarima navodno, uopšte nema goriva što bi mu omogućiilo da na vrijeme isplovi sa mjesta gdje je ugrožen zbog oluje i premjesti se na siguran vez.

Preporučujemo za Vas