Matične ćelije dobijene iz kože postale su "bake", nakon što je više generacija života stvoreno u naučnim ekperimentima u Japanu.
Ćelije su korištene za stvaranje jajašaca, koja su zatim oplođena da bi nastali miševi, a oni su se kasnije uspješno razmnožili, javlja BBC.
Ukoliko ova tehnika bude primijenjena na ljudima, mogla bi da pomogne parovima da dobiju djecu i da čak omogući ženama da prevaziđu menopauzu.
Međutim, stručnjaci tvrde da će prije toga biti potrebno srušiti mnoge naučne i etičke prepreke.
Matične ćelije su sposobne da se transformiršu u svaki drugi oblik ćelije u tijelu, od krvnih do koštanih, od ćelija nerava do ćelija kože.
Prošle godine naučni tim na Univerzitetu Kjoto je uspio da stvori održivu spermu iz matičnih ćelija. Sada je na sličan način dobio i jajne ćelije. Koristili su matične ćelije iz dva izvora: one uzete iz embriona i ćelije slične ćelijama kože koje su reprogramirane da postanu matične ćelije.
Prvi korak, o kojem je izviještavao časopis "Science", je transformisanje matičnih ćelije u jajne ćelije. Zatim je stvorena neka vrsta jajnika koji okružuje mlade jajne ćelije drugim oblicima ćelija kakve se obično nalaze u jajniku. Sve je to zatim presađeno u tijelo ženke miša.
Tehnike in-vitro oplodnje korištene su za sakupljanje jajašaca, njihovu oplodnju spermom mužjaka i usađivanje oplođenog jajašca u tijelo surogat-majke.
Dr. Katsuhiko Hajaši, sa Univerziteta Kjoto, potvrdio je za BBC da su ovim postupkom dobivjeni zdravi i plodni mladi miševi. Ti su se mladi miševi kasnije i sami prirodnim putem razmnožili pa se može reći da su njihovi mladunci "unuci" ćelije iz laboratorije.
Bonus video:
