NA KRAJU UNDERHILL-A

Elemental u Podgorici: Mi imamo premijera u austrijskom zatvoru. A vi?

"Napokon sam ovdje" poručila je Remi sa bine, dok je pozdravilo oko hiljadu prisutnih ovacijama
53 pregleda 0 komentar(a)
Ažurirano: 26.02.2019. 13:00h

Jedan od najtraženijih sastava u regionu, zagrebački “Elemental” konačno je posjetio i naše krajeve, a u kombinaciji sa publikom željnom ovakvih događaja njihov koncert na Stadionu malih sportova bio je pravi način da se zatvori ovogodišnji “Underhill festival”.

S obzirom na to da je ovo bio prvi koncert u Crnoj Gori hrvatske hip hop grupe u njihovoj 13-ogodišnjoj karijeri, ne čudi činjenica da je publika konstantno tražila pjesmu više, a na kraju se ispostavilo da nije bilo dovoljno vremena ni da bend odsvira sve pjesme koje je želio, jer je, kako reče Remi, pjevačica grupe, “policija stigla tačno na vrijeme”.

Ovaj put bez tehničkih problema koncert je započeo oko 23.30 numerom "Pod pritiskom" uz "ne baš impresivan izlazak na binu" kako je šaljivo izjavio Shot.

"Napokon sam ovdje" poručila je Remi sa bine, dok je oko hiljadu prisutnih ovacijama pozdravilo uvodne taktove pjesme "Tako lijepa".

Elemental je na samom početku koncerta isporučio nekoliko hitova sa albuma "Vertigo" i "Pod pritiskom", na koje su prvi redovi pred binom, sačinjeni od njihovih najvjernijih fanova, reagovali plesom, skakanjem i pjevanjem.

Žene su im najzagriženiji fanovi

I pored toga što ovu grupu predvodi duo MC-eva Remi i Shot, muška polovina ovog dueta bila je donekle u sjenci svojim mirnim pristupom, prepustivši plavokosoj saputnici da energičnim nastupom preuzme svu pažnju na sebe i zavlada binom.

Nakon izvođenja numere "Priroda i društvo", takođe socijalno angažovane, Remi je po rekaciji publike zaključila "da smo svi u istim gov*ima".

Dok Remi i Shot, smjenjući se, rafalno ispaljuju svoje stihove na mikrofonu, prati ih uigran bend koji bez ikakvih egzibicija svira upravo onoliko koliko treba da im pruži podršku svojim funky/jazz repetativnim melodijama.

Većina pjesama koje je “Elemental” izveo na ovom koncertu mogu se podijeliti na one sa ljubavnom, te sa političkom tematikom.

Pored brojnih hitova kao što su "Crveno", "Priroda i društvo", "Zašto te imam", "Male stvari" i drugi, najveće ovacije pobrala je "Iz dana u dan", numera koja preispituje društvene okolnosti u Hrvatskoj nakon sticanja nezavisnosti.

Interesantno je bilo vidjeti kako i pored teške socijalne tematike u pjesmi, hrvatski sastav lako uspijeva da natjera prisutne na mahanje rukama u ritmu muzike i višeglasno pjevanje refrena.

Tekstovi “Elementala” su često kritički nastrojeni prema ovdašnjem mentalitetu i društvenim pitanjima, pa se Remi na Stadionu malih sportova zahvalila političarima na inspiraciji.

“Mi imamo premijera u austrijskom zatvoru", pohvalio se Shot i upitao: “A kada ćete vi to imati?”

"Svi smo u istim gov*ima"

Nakon izvođenja numere "Priroda i društvo", takođe socijalno angažovane, Remi je po rekaciji publike zaključila "da smo svi u istim gov*ima".

“Mi imamo premijera u austrijskom zatvoru", pohvalio se Shot

Uz šalu da im je ovo "najbolji koncert koji su imali ovog tjedna", numerom "Sama" hrvatski bend je priveo koncert kraju malo prije jednog sata poslije ponoći.

Ipak, publika je očekivano tražila bis pa se “Elemental”, očigledno željan svirke, na oduševljenje prisutnih vratio na binu i odsvirao nekoliko pjesama među kojima se našla i neizbježna "Romantika", jedan od najvećih njihovih hitova.

Taman kada je najavljena "Dal sjećaš se", kako reče Remi "za sve old skul fanove", koncert je ipak morao biti prekinut zbog zakona koji zabranjuje žive nastupe na otvorenom nakon jedan sat poslije ponoći.

"Ostalo nam je još par pjesama koje nismo izveli večeras. Ako želite da ih čujete, vidimo se na jesen. Dolazimo!" poručila je Mirela Priselac - Remi, a zatim je bend pozdravio prisutne , do sljedećeg gledanja.

Nije bilo dovoljno vremena da bend odsvira sve pjesme koje je želio, jer je, kako reče Remi, pjevačica grupe, “policija stigla tačno na vrijeme”