Slučaj Planinska

Nova optužnica protiv Ive Sanadera

Županijski sud u Zagrebu osudio je Sanadera u novembru na jedinstvenu kaznu od 10 godina zatvora za primanje mita i ratno profiterstvo
53 pregleda 1 komentar(a)
Ažurirano: 13.12.2012. 14:59h

Županijski sud u Zagrebu potvrdio je petu optužnicu protiv bivšeg premijera i predsjednika Hrvatske demokratske zajednice (HDZ) Ive Sanadera i to zbog malverzacija oko prodaje jedne poslovne zgrade u Zagrebu hrvatskoj vladi.

U slučaju "Planinska" tereti se, zajedno s bivšim ministrom iz HDZ-a Petrom Čobankovićem i vlasnikom lanca mesara, HDZ-ovcem Stjepanom Fiolićem, za učešće u malverzacijama oko prodaje zgrade u Planinskoj ulici u Zagrebu Ministarstvu regionalnog razvoja po znatno većoj cijeni od tržišne.

Četvrtooptuženi u ovom slučaju je Mladen Mlinarević, čija je firma vrijednost zgrade i zemljišta procijenila na nerealno visok iznos.

Sumnja se da mu je Sanader na čuvanje dao vrijedne umjetnine pošto mu je prijetila blokada imovine zbog nekoliko antikorupcijskih istraga

Tužilac Tonči Petković rekao je novinarima poslije sjednice da su Fiolić i Čobanković priznali krivicu, ali da nisu postignute nagodbe kako su spekulisali mediji.

On je odbacio tvrdnje Sanaderove odbrane da se slučaj oslanja samo na priznanja dvojice optuženih, dodavši da postoje i drugi dokazi.

Sanaderov advokat Jadranka Sloković rekla je novinarima da će tokom suđenja dovesti u pitanje priznanja saoptuženih. Ona je ocijenila da će za oko mjesec biti održano pripremno ročište na kojem treba da se odredi datum početka suđenja.

Bivši premijer sredinom jula je pred hrvatskim istražiteljima odbacio optužbe da je zajedno sa dvojicom bivših stranačkih kolega učestvovao u prodaji zgrade u Planinskoj ulici u Zagrebu hrvatskom ministarstvu.

Sumnjiče se da su 2009. omogućili nezakonitu prodaju poslovne zgrade u Planinskoj ulici po znatnoj većoj cijeni od tržišne. Tu je zgradu Ministarstvo regionalnog razvoja od Fiolića kupilo za oko 10,5 miliona eura.

Stjepan Fiolić

U medijima su se ranije pojavili iskazi istražiteljima i Čobankovića i Fiolića. Navodno Čobanković tvrdi da je sve radio po Sanaderovom nalogu.

Iako je Fiolić najprije istražiteljima rekao da je novac od prodaje Planinske ostao kod njega naknadno je, kako su pisali mediji, promijenio iskaz rekavši da je oko 20 miliona kuna izvučenih iz Planinske predao Sanaderu.

Uz to je istražiteljima rekao i da je bivši premijer na njegovom imanju sakrio pet slika Vlahe Bukovca za koje tužilaštvo sumnja da ih je bivši premijer kupio novcem izvučenim iz državnih institucija i firmi preko marketinške agencije "Fimi-medija".

Sumnja se da mu je Sanader na čuvanje dao vrijedne umjetnine pošto mu je prijetila blokada imovine zbog nekoliko antikorupcijskih istraga.

U javnom nastupima, bivši premijer optužio je glavnog hrvatskog državnog tužioca Mladena Bajića da protiv njega vodi "krstaški rat" i tvrdi da su ostali optuženi u tom slučaju, prije svega Fiolić, bili ucjenjivani kako bi krivicu prebacili na njega.

Županijski sud u Zagrebu osudio je Sanadera u novembru na jedinstvenu kaznu od 10 godina zatvora za primanje mita i ratno profiterstvo u slučajevima "Ina-Mol" i "Hypo banka". Na tu kaznu ima pravo žalbe Vrhovnom sudu.