Grenlandska policija je uhapsila dvije aktivistkinje organizacije za zaštitu životne sredine Grinpis (Greenpeace) na naftnoj platformi "Leiv Erikson", na moru nedaleko od grada Nuuk na Grenlandu, koje su tu bile od 29. maja u pokušaju da spriječe početak bušenja u potrazi za naftom.
U saopštenju objavljenom na sajtu danskog ogranka Grinpisa navodi se da je hapšenje aktiviskinja "prošlo bez dramatike i da su one osumnjičene za neovlašćen ulazak na privatni posjed i kršenje zabrane ulaska u sigurnosnu zonu (oko platforme)".
Aktivistkinje Hana i Luke su na platformi škotske naftne kompanije Kern enerdžis (Cairn Energys) provele oko 90 sati viseći u nekoj vrsti "kapsule za preživljavanje", neposredno ispod samih uređaja za bušenje, na 25 metara iznad ledeno hladnog arktičkog okeana.
Grinpis je u jednom ranije izdatom saopštenju ocjenio da su planirana podvodna bušenja u toj oblasti "toliko rizična da do njih nikako ne bi smjelo da dođe", kao i da se škotska kompanija "kocka s prirodom Grenlanda".
Ostrvo Grenland je pod suverenitetom Danske, ali ima svoju autonomnu vladu koja podržava podvodna bušenja u potrazi za fosilnim gorivom pored obale, u nadi da će to pospješiti usporeni ekomonski razvoj ostrva.
Bonus video:
