Zelenski: Zlo se vratilo, ne može pobjeći od odgovornosti, ne može se sakriti u bunkeru

Invazija na Ukrajinu ubila je hiljade i raselila skoro 10 miliona ljudi, od čega je pet miliona otišlo van zemlje

9258 pregleda 15 komentar(a)
Zelenski, Foto: Facebook
Zelenski, Foto: Facebook

Ukrajinski predsjednik Volodimir Zelenski rekao je u nedjelju, 8. maja, da se zlo vratilo u Ukrajinu, u emotivnom obraćanju na Dan pobjede, kada Evropa obilježava zvaničnu predaju nacističke Njemačke saveznicima u Drugom svjetskom ratu.

Život za koji su se vojnici borili u tom ratu okončan je 24. februara kada su ruske snage izvršile invaziju, naveo je on u video poruci.

"Zlo se vratilo. Opet! U drugom obliku, pod različitim sloganima, ali sa istom svrhom", rekao je predsjednik Ukrajine i dodao da će Ukrajina i njeni saveznici pobijediti.

"Nijedno zlo ne može pobjeći od odgovornosti, ne može se sakriti u bunkeru", kazao je, aludirajući na nacističkog vođu Adolfa Hitlera koji je posljednje dane svog života proveo u bunkeru u Berlinu gdje je izvršio samoubistvo.

Moskva svoje akcije od 24. februara, kada je napala Ukrajinu, naziva "specijalnom vojnom operacijom" za razoružavanje i obračun sa onim što ona naziva "nacistima" i antiruskim nacionalizmom koji podstiče Zapad, podsjeća agencija Rojters.

Invazija na Ukrajinu ubila je hiljade i raselila skoro 10 miliona ljudi, od čega je pet miliona otišlo van zemlje.

Sjedinjene Američke Države, Evropska unija i druge zemlje uvele su oštre sankcije Rusiji zbog invazije na Ukrajinu

U Rusiji, Dan pobjede koji se obilježava 9. maja jedan je od najvažnijih nacionalnih događaja u zemlji. U znak sjećanja na ogromne žrtve koje je Sovjetski Savez podnio u pobjedi nad nacističkom Njemačkom organizuje se niz manifestacija a centralna je vojna parada na Crvenom trgu.