KONZERVATIVNI PREMIJER NIKADA NIJE OSVOJIO DVA UASTOPNA MANDATA

Iako je najsrećnija zemlja na svijetu, Norvežani možda promijene vlast

Ankete najavljuju izborni triler. Za većinu u norveškom parlamentu potrebno je 85 zastupničkih mandata
1 komentar(a)
Norveška zastava, Foto: Shutterstock
Norveška zastava, Foto: Shutterstock
Ažurirano: 09.09.2017. 14:02h

Na parlamentarnim izborima u Norveškoj u ponedjeljak se očekuje tijesna trka, a presudnu ulogu u formiranju buduće vladajuće koalicije moglo bi da ima nekoliko manjih stranaka koje su po anketama negdje na ivici ulaska u parlament, pišu agencije.

O tome koliko će manjih stranaka preći izborni cenzus zavisiće sastav nove vlade jer velike stranke je neće moći sastaviti same.

Premijerka Erna Solberg, čelnica Konzervativne stranke, posljednje četiri godine vodi manjinsku vladu desnice u kojoj je i populistička Napredna stranka.

Njena manjinska vlada zavisila je od podrške dvije stranaka centra, liberala i demohrišćana, koje nisu željele u formalnu koaliciju zbog neslaganja sa antiimigracionom politikom Napredne stranke.

Iako je vlada Erne Solberg izdržala puni mandat, tenzije između populista, demohrišćana i liberala gotovo su stalno bile prisutne, prenosi agencija Hina.

U predizbornoj kampanji premijerka je obećala nova radna mjesta, smanjenja lista čekanja u zdravstvu, veći proračun vojsci i policiji, kao i unapređenje socijalne zaštite.

Norveška ekonomija se oporavlja od krize izazvane oštrim padom cijena nafte, ali je taj sektor izgubio 50.000 radnih mjesta od 2013. do 2016. godine. Vlada je posljedice neutralizovala smanjenjem poreza, ali se sve više čuju glasovi da je potrebno transformirati ekonomiju jer je previše zavisna od nafte.

Solberg je uspjela da neutralizuje i drugu veliku krizu u svom mandatu, veliko povećanje broja imigranata. Istorijski imigracioni talas koji je 2015. uzdrmao Evropu zahvatio je i Norvešku, zemlju sa 5,3 miliona stanovnika gdje je te godine bilo više od 30.000 zahtjeva za azil.

Evropa je od tada zatvorila svoje granice, a Norveška postrožila uslove useljavanja i talas izbjeglica u zemlju je zaustavljen.

Iako se Norveška redovno nalazi na vrhu popisa najbogatijih i najsrećnijih zemalja svijeta, to ne znači da tamo nije moguće izgubiti izbore.

"Uvijek je lakše biti kritičan nego zahvalan. Bogatstvo norveških građana uzrokuje i dodatna očekivanja koja je vrlo teško ispuniti, bez obzira na stranku", kaže politički analitičar Bernt Ardal.

U norveškoj istoriji nijedan konzervativni premijer nije osvojio dva uzastopna mandata.

Glavni protivkandidat aktualnoj premijerki je Jonas Gahr Store, čelnik Laburističke strake i bivši ministar vanjskih poslova u vladi Jensa Stoltenberga, sadašnjeg generalnog sekretara NATO-a.

On tvrdi da je Solberg u posljednje četiri godine Norvešku pretvorila u hladniju i zatvoreniju zemlju. Naglašava i da treba osnažiti socijalnu državu.

"Norveška nije imuna na ono što se događa u svijetu, a to znači da i kod nas rastu nejednakosti", rekao je.

Ankete najavljuju izborni triler. Za većinu u norveškom parlamentu potrebno je 85 zastupničkih mandata, prenosi Hina.

Sedam dana prije izbora anketa agencije Kantar predvidjela je 87 mandata za vladajuću konzervativnu koaliciju, devet manje nego prije četiri godine, ali dovoljno za pobjedu.

Nekoliko dana kasnije ispitivanje javnoga mnjenja dnevnika VG pokazalo je da lijeva koalicija ima 86 mandata.

Izborni prag iznosi četiri odsto, a Liberalna stranka je na ivici cenzusa. Ako liberali ne pređu izborni prag, Solberg će teško do drugog mandata.

Store je uvjeren da će laburisti i njihovi parnteri u vladi od 2005. do 2013. godine, Stranka centra i Stranka socijalističke ljevice, doći do dovoljnog broja mandata za povratak na vlast.